versi pupuh sinom

SINOM LUDRUK

1. Sembah pangubakti titiang
Ring ida hyang prama kawi
Sang hyang saraswati puja
Sweca ratu manyunarin
Manah titiang miasa kerti
Malarapan tembang kidung
Satsat tekine akupak
Yening ratu manyuecanin
Nunas suluh
Manah titiang sida galang

2. Kadi sarat manah titiang
Yening ida dane lali
Maring seni budaya bangsa
Adat agama ne malih
Sanjatane pinih sakti
Sandang pisan sungsung suwun
Mangda bali ne mesinar
Kitab lontar luwih luwih
Anggen nuntun
Ala ayu mangda sinah

3. Antuk liang manah titiang
Ngaturin suksmeng hati.
Titiang nista lintang tuna
Pangkah purun mengaturin
Sane onang gita santhi
Mogi wiakti neken kayun
Rasa galang manah titiang
Kadi ratih kala wengi
Ngawe teduh
Sida mengaturang gita



SINOM LUMRAH

1. Atur titiang ring sesama
Utamane ring para santi
Maring pulau dewata
Dasar kayun saking jati
Subakti ring sang hyang widhi
Diastun antuk makekidung
Lanturang laksana melah
Sarahina ya mabukti
Sat pemucuk
Dadi tatuladan jagat

2. Bawos banban Ngawe rena
Matetuek nyunyur manis
Ngaleganin sang miragia
To ngawemin salah tampi
Tan ngewetuang sakit hati
Ngiro tatit sang mengrungu
Boye kasar tuara tampak
Sida ngiket braya kanti
Bawos sadu
Tanbina sekadi tamba


SINOM PAYANGAN

1. Suwe antuk maminehang
Ngawenin legan prekanti
Uli dija ban ngawitang
Keken abete nyumunin
Tuara panggih ane pasti
Pemargine tan pesuluh
Peteng dedet tan merawat
Pati kacuh kema mai
Ngawe buwut
Legan braya dadi sirna

2. Ade tuarane adukang
Ede bas mengawi-awi
Ane saja apanga saja
Eda pati liu munyi
Nanging tuara ade bukti
Yasa kerti anggen nuntun
Pesaja ane utama
Sat-sat usadene sidi
Tur kegugu
Munyi melah sat-sat swarga.


SINOM SILIR

1. Kudang warsa tityang mengayah
Ring ambara megita santhi
Rasa tuara ada ngrunguang
Napi malih ne ngajinin
Kadi barang tan peaji
Nanging liu anake nuwut
Kadi sandate ring teba
Bungan nyane kasumpangin
Liu nyuwun
Punyan nyane kekiladang

2. Diastun ipun tan pengerunguan
Setata ngaturin miyik
Diastu layu yekekutang
Kajekjek ya ke entungang
Bungan sandat ilang ilid
Nanging ambunya mengalup
Miyik nyane mengenyudang
Tansida pacang memegatin
Rasa kedaut
Ane ilang buin teka.

3. Ring imirah tiyang mabesen
Lamun tulus titiang mati
Rurubin ban canigara
Galengin pudake miyik
Dindingin ban sarwa sari
Lelet antuk sekar gadung
Antiang pusuh cempaka
Rurub kajang sruni kuning
Sekar tunjung
Punika pinaka angenan.


SINOM LAWE

1. Paplengkungan sekar sungsiah
Mapurangap bon sanga langit
Ergilo pinaka hulun
Mala luhur pucuk putih
Pantes ya masari kuning
Mapurada sami menurut
Langsiang kedapan soka
Kedapa sekar jempiring
Kepet rurus
Matulis manuh dewata.

2 .Yening cening nunas wasuhan
Tirta panglukatan malih
Anggen genahe utama
Toples gelas lumur malih
Bungbunge pinih utami
Eda cening ulah aluh
Mangda enggal polih genah
Raris numbas kantong plastik
Ulalh aluh
Dingabene laut tatad.


SINOM LAWE ARJA

1. Mirib tusing mautama
Wasuan tirtane ento cening
Cening patut ngutamayang
Gemuh adate di bali
Apebuin bukejani
Gumi baline kasuhur
Kasub di manca negara
Liu anake nelokin
Saking suluh
Keneh nyane apang nawang.

2. Patut cening manyuciang
Apan tirta lintang luwih
Paican Ida Betara
Munahang sekancan gering
Miwah wecine ring gumi
Napi malih baline kesumbung
Cening patut ngutamayang
Mangda bali tetep asri
Tur kesumbung
Langgeng ring dura negara.


Olih : http://widyasastra.blogspot.com